Ymgynghoriad wedi'i dargedu ar Ran 1

Cynhaliwyd dau ymgynghoriad cyhoeddus ar gyfer Rhwydwaith Ynni Gwyrdd Rhiwlas yn 2023 a 2024. Roedd y rhain yn holi am farn ar goridor y llwybr a lleoliadau arfaethedig y polion pren ar gyfer y llwybr cyfan.

Ers hynny, rydym wedi adolygu pob darn o adborth yn ofalus, gan gynnwys awgrymiadau penodol ar gyfer newidiadau dylunio, ac rydym wedi ystyried canfyddiadau arolygon peirianneg ac amgylcheddol parhaus.

Mae'r broses wedi nodi lleoedd lle gallem wneud diweddariadau i'n cynigion, gan gynnwys symud aliniad y llwybr tua'r dwyrain y tu allan i'r coridor ymgynghori blaenorol rhwng yr is-orsaf gasglu ger Cefn Coch a Clatter.

Gan fod hwn yn newid, rydym wedi lansio ymgynghoriad wedi'i dargedu ar y rhan benodol hon fel y gall y gymuned gael dweud ei dweud cyn yr ymgynghoriad statudol ar y llwybr cyfan yn ddiweddarach yn 2026.

Mae'r ymgynghoriad wedi’i dargedu hwn ar ran y llwybr rhwng Clatter a Chefn Coch yn cael ei gynnal o ddydd Mercher 11 Chwefror 2026 tan ddydd Mercher 11 Mawrth 2026.

Pam mae'r newid hwn wedi cael ei awgrymu?

Mae'r is-orsaf gasglu ger Cefn Coch yn rhan o brosiect Efyrnwy Frankton. Yn dilyn ymgynghoriad statudol, asesiadau peirianneg pellach, a dadansoddiad o’r effeithiau cronnus ar yr ardal, mae lleoliad newydd wedi’i gynnig ar gyfer yr is-orsaf gasglu. Mae wedi cael ei hail-leoli i gyfeiriad y gogledd-orllewin er mwyn lleihau faint o seilwaith sydd i gyd.

Mae'r is-orsaf gasglu yn dal i fod yn ardal Cefn Coch; fodd bynnag, mae llwybr y polion pren sy'n arwain ati wedi newid.

Mae rhagor o fanylion am brosiect Efyrnwy Frankton ar gael yn www.greengenvyrnwyfrankton.com.

Rhoddwyd ystyriaethau pellach hefyd i geisiadau cynllunio posibl yn y rhanbarth, felly cynigiwyd llwybr newydd yn y rhan hon i ystyried y rhain i gyd.

Beth fydd yn digwydd ar ôl yr ymgynghoriad wedi’i dargedu hwn?

Bydd yr holl adborth a gawn o'r ymgynghoriad wedi’i dargedu hwn yn cael ei ystyried yn ofalus wrth i ni ddatblygu ein cynlluniau, ochr yn ochr â chanfyddiadau asesiadau technegol ac arolygon amgylcheddol.

Ein cam nesaf fydd datblygu dyluniad ac aliniad mwy manwl ar gyfer cysylltiadau’r llinell uwchben newydd, gan gynnwys penderfynu ar leoliadau terfynol ar gyfer y polion pren, rhan y cysylltiad tanddaearol ac unrhyw seilwaith dros dro a allai fod yn ofynnol, fel ffyrdd mynediad ac ardaloedd gosod gwaith adeiladu.

Yna, byddwn yn cynnal astudiaethau technegol ac amgylcheddol manwl, a’n bwriad yw cynnal ymgynghoriad cyhoeddus statudol ar y llwybr cyfan yn ddiweddarach yn 2026.

Byddwn yn cyhoeddi adroddiad yn crynhoi’r adborth o’r ymgynghoriad wedi’i dargedu hwn a sut mae wedi dylanwadu ar ein cynigion.

Bydd hyn yn cefnogi'r ymgynghoriad cyhoeddus nesaf, pan fydd pobl yn gallu rhoi mewnbwn ar aliniad manwl y llwybr, gan gynnwys unrhyw leoliadau diwygiedig ar gyfer y polion pren, llwybrau mynediad a mannau gweithio.

Mae llinellau trydan newydd sy’n 132kV neu’n uwch yn cael eu cyfrif yn Brosiectau Seilwaith Arwyddocaol (SIPs), sy'n golygu bod gofyn am ganiatâd Penderfyniadau Cynllunio ac Amgylchedd Cymru (PEDW) a bod y penderfyniadau terfynol yn cael eu gwneud gan Weinidogion Cymru.

Yn dilyn ein hymgynghoriad cyn-ymgeisio a chwblhau'r Asesiad Effaith Amgylcheddol (EIA), byddwn yn cyflwyno cais cynllunio i Penderfyniadau Cynllunio ac Amgylchedd Cymru (PEDW) yn 2027. Yna, bydd arolygwyr cynllunio annibynnol yn cynnal rownd derfynol o ymgynghori statudol cyn gwneud argymhelliad i Weinidogion Cymru ynghylch a ddylid rhoi caniatâd cynllunio ar gyfer y cais ai peidio.

Os bydd y prosiect yn cael caniatâd, bydd y gwaith adeiladu yn dechrau yn 2028, gydag ynni'n cael ei ddosbarthu i gartrefi a busnesau Cymru erbyn 2029.